Como nace o DisCamino?
A historia do DisCamino comeza en agosto de 2009, cando Gerardo, un rapaz xordocego de Vigo, fixo o seu primeiro Camiño de Santiago pedaleando sobre un Copilot, triciclo tándem de orixe holandés que unha alma caritativa lle decidiu doar para que puidese cumprir o seu soño.
Unha vez na praza do Obradoiro, cando a ruta chegara ao seu fin e os que acompañaramos aquel entusiasta peregrino aventureiro nos felicitabamos por acabala sen contratempos, Gerardo pronunciou unhas palabras que nos marcaron profundamente: «Javier, busca máis persoas con problemas coma min para facer o Camiño por moitos anos».
Acababa de nacer o DisCamino.
Que é o DisCamino?
O DisCamino converteuse na nosa ferramenta para lograrmos que calquera persoa discapacitada poida gozar de todo o que a peregrinación lle ofrece a calquera peregrino do Camiño.
Mais o DisCamino non é só a ruta: é a preparación física e mental necesaria para levar a cabo este reto; é o compañeirismo que xorde nos desafíos compartidos, é a ilusión de se implicar en algo que mudará a túa vida e que a encherá de significado; é o día a día de moitas persoas que, aínda que nunca vaian poder pedalear, teñen a necesidade de algo, ou de alguén que lles axude ou que os acompañe no seu paso por este mundo.
A desorde dos sentidos
En 2012, Javier Luque e o seu fillo Antonio, con parálise cerebral, percorreron o Camiño de Santiago en triciclo, desde Roncesvalles, e realizouse un documental.
O documental El desorden de los sentidos embárcanos nunha viaxe de coñecemento que atravesa os nosos cinco sentidos para amosarnos a realidade do mundo de Antonio e de Gerardo, dous mozos discapacitados que se enfrontan á ruta francesa do Camiño de Santiago en bicicleta. Coa axuda de familiares e amigos, os nosos protagonistas amósannos que o verdadeiro camiño segue alén de Santiago de Compostela.
Unha viaxe de coñecemento a través de novas formas de percepción da man de Antonio e de Gerardo, dous mozos discapacitados que fan o Camiño de Santiago en bicicleta.